عاللِّي بَاعْ و شْرَى

عاللِّي بَاعْ و شْرَى، لْقَى رُوحُو بِينْ فْضَى وْهْوَى

باع الجِبَّة والكَبُّوس، شرى برنيطة بَّرشة فلوس

باع الزكرة والطبّال، حرق لروما، رجع بطّال
باع البرنوس والقشّابيّة، تغطّى بكرافات فرانساوية

باع الخلّة والحنّة، شرى برطابل، يعمل الرنّة
باع المُهْرَة والخيّالي، عْطَاوَهْ خردة تْوَخِّرْ إِلْتَالِي
بَاعْ المِنْسِجْ والطَابُونَة، صْبَحْ يْمَوِّلْ في الطَاحُونَة
باع الزيتونة وباع الملّة، عمل قميص وحالة جِرْتِلَّة
باع النجمة ومعاها الهلال، براية كحلة بْكُلّْهَا هْبَالْ

  باع البسيسة والخرّوب، ركب البحر، حرق القلوب 

الأم تبكي، تساسي، تنادي، وينو عرشي، وينهم ناسي

تشوف في وجوه، تقول تعرفها، تقرب، تلقاها مَابْعَدْهَا

وجوه ناس تقول محمومة، مستلبسة، كوجه البومة

إِللِّي مخّو في الأفغان، واللِّي عينو عالطليان

إِللِّي يبكي عالفكرون، واللِّي شراه العم شارون

إِللِّي ولاّ سيدي تاتا، واللِّي سِلْتِتُّوا السلّاتَا

إِللِّي قالو عليه هْتِرْ، واللِّي ما عادش عندو قْدَر
واللِّي لا ربِّي لا سِيدُو، اللِّي النَّكْبَة صْنَعْهَا بِإيدُو
إِللِّي كفوفو بالحرقوس، واللِّي دارو بلا ناقوس

  وإِللِّي يحكي تقول ترينو، اللِّي مكتوب أطرش على جبينو
وإِللِّي عايش كالفِرْززُّو، لا عمل عسل، لا جاء شكون هزُّو
وإِللِّي يغنّيلك عالحرّية، إِللِّي محضّرك سيفو في الثنيّة 
وإِللِّي هازز يِدُّو، مْرَبّعْ، اللّي عالكرسي إتْرَبّعْ

قالوا في بلاد الوِرْوَارْ، مرسي طْلَعْ موش مِغْوَارْ

شعّل شمعة، حب يضَوِّي، ظلّم الدنيا وحرق الدّار

شعلت بينهم حديد ونار، والفرحة ما تمّت وما طْلَعْ نْهَارْ

عمّو مرسي طْلَعْ موش رُومَنْسِي، عمّو مرسي طْلَعْ غَدّار

السيسي ما صدّق، نط نطّة، طْلَعِّلهُم من قلب الغار
قلب الطاولة، فركش اللعبة، والحكاية، عمل منها آفار
فهم الغنّوشي، الحكاية فنّوشي، قلب الفيستة جهار بهار
رجع يترهدن، عيني عينك، عمل فيها حتى شي ما صار
العم غنّوشي، راكب بلّوشي، العم غنّوشي طبعو غدّار
  
النيزنوت